Një studim i ri, i publikuar në revistën shkencore British Journal of Sports Medicine, sugjeron se nuk nevojiten orë të tëra në palestër për të përfituar nga ushtrimet me pesha. Sipas studiuesve, 90 deri në 120 minuta stërvitje me pesha në javë mund të jenë sasia optimale për të ulur rrezikun e vdekjes së parakohshme.
Hulumtimi ndoqi pjesëmarrësit për rreth 30 vjet dhe zbuloi se personat që stërviteshin me pesha në këtë interval kohor kishin:
- 13% rrezik më të ulët të vdekjes nga çdo shkak;
- 19% rrezik më të ulët të vdekjes nga sëmundjet kardiovaskulare;
- 27% rrezik më të ulët të vdekjes nga sëmundjet neurologjike.
Përfitimet ishin edhe më të mëdha tek ata që ushtrimet me pesha i kombinonin me aktivitet aerobik, si ecja e shpejtë, vrapi ose çiklizmi. Studiuesit theksojnë se pas rreth 120 minutash në javë nuk u vu re ndonjë përfitim shtesë i rëndësishëm për jetëgjatësinë.
Ekspertët rekomandojnë që, përveç 150 minutave aktivitet fizik të moderuar në javë, të përfshihen edhe ushtrime për forcimin e muskujve të paktën dy herë në javë, pasi ato ndihmojnë jo vetëm në ruajtjen e masës muskulore, por edhe në mbrojtjen e zemrës, trurit dhe shëndetit të përgjithshëm.
