Shërbimi Spitalor dhe Klinik Universitar i Kosovës (SHSKUK) ka bllokuar 1,432 njësi të produktit medicinal “Compound Sodium Lactate Intravenous Infusion BP 500 ml” në Spitalin Rajonal “Sami Haxhibeqiri” në Mitrovicë, deri në përfundimin e analizave laboratorike.
Sipas SHSKUK-së, masa është ndërmarrë pasi farmacistja përgjegjëse e barnatores së spitalit ka raportuar dyshime se produkti mund të mos përmbushë specifikat e kërkuara.
Pas raportimit, më 17 qershor 2026, Inspektorati Farmaceutik dhe Agjencia e Kosovës për Produkte dhe Pajisje Medicinale (AKPPM) kanë kryer inspektim në spital, duke verifikuar gjendjen e produktit të dyshuar.
Me vendim të inspektoratit është urdhëruar bllokimi i të gjitha njësive të këtij produkti deri në përfundimin e analizave laboratorike dhe vlerësimeve profesionale nga institucionet përgjegjëse.
SHSKUK ka njoftuar se rezultatet përfundimtare do të bëhen publike pas përfundimit të procedurave, ndërsa deri atëherë produkti mbetet jashtë përdorimit.
