Rastet me fruth vazhdojnë të regjistrohen në Kosovë, ndërsa Instituti Kombëtar i Shëndetësisë Publike të Kosovës ka bërë thirrje për vaksinimin e fëmijëve kundër kësaj sëmundjeje.
Sipas të dhënave të fundit të IKShPK-së, nga 16 prilli deri më 6 shtator 2026 në Kosovë janë konfirmuar gjithsej 158 raste me fruth. Vetëm gjatë javës së fundit janë regjistruar shtatë raste të reja.
Shqetësues mbetet fakti se mbi 95 për qind e personave të prekur nga fruthi nuk kanë qenë të vaksinuar me vaksinën MMR, e cila ofron mbrojtje kundër fruthit, shytave dhe rubeolës.
IKShPK ka rikujtuar se vaksinimi mbetet masa kryesore për mbrojtjen e fëmijëve dhe parandalimin e përhapjes së sëmundjes në komunitet.
Instituti ka intensifikuar gjithashtu vaksinimin e vonuar, të njohur si “catch-up”, për fëmijët që për arsye të ndryshme nuk e kanë marrë vaksinën në kohën e paraparë.
Gjatë këtij viti, mbi 2,700 fëmijë të moshës 2 deri në 5 vjeç janë vaksinuar përmes këtij programi.
Rritja e rasteve gjatë vitit 2026 është e dukshme. Deri më 24 gusht ishin regjistruar 147 raste, numër që sipas IKShPK-së ishte më shumë se dyfishi i rasteve të konfirmuara gjatë gjithë vitit 2025.
