Një studim i ri i udhëhequr nga studiues të University of Glasgow ka zbuluar se periudhat e gjata të qëndrimit ulur ose të shtrirë, pa lëvizje, mund të lidhen me një rrezik më të lartë të vdekjes nga kanceri.
Studiuesit analizuan të dhënat e më shumë se 91 mijë personave, të cilët u ndoqën mesatarisht për 12 vjet përmes pajisjeve që matnin aktivitetin fizik. Rezultatet treguan se çdo orë shtesë e kaluar ulur pa ndërprerje shoqërohej me një rritje prej rreth 10% të rrezikut të vdekjes nga kanceri.
Sipas hulumtimit, ndërprerja e periudhave të gjata të uljes me aktivitete të lehta, si ecja e ngadaltë ose punët e shtëpisë, mund ta ulë ndjeshëm këtë rrezik. Zëvendësimi i një ore qëndrimi ulur me aktivitet të lehtë u shoqërua me një ulje prej 12% të rrezikut, ndërsa vetëm pesë minuta aktivitet intensiv u lidhën me një ulje prej 22%.
Autorët theksojnë se studimi tregon një lidhje statistikore dhe nuk provon drejtpërdrejt shkak-pasojë, por rezultatet mbështesin rekomandimet që njerëzit të shmangin qëndrimin ulur për periudha të gjata dhe të bëjnë lëvizje të shpeshta gjatë ditës.
