Një studim i ri sugjeron se vaksina më e fundit kundër COVID-19 (sezoni 2024–2025) mund të ofrojë përfitime që shkojnë përtej mbrojtjes nga virusi, duke u lidhur edhe me një rrezik më të ulët të ngjarjeve serioze kardiovaskulare.
Hulumtimi analizoi të dhënat shëndetësore të më shumë se një milion veteranëve amerikanë. Studiuesit krahasuan afro 350 mijë persona që morën njëkohësisht vaksinën kundër COVID-19 dhe atë të gripit me rreth 700 mijë të tjerë që morën vetëm vaksinën e gripit.
Rezultatet treguan se personat e vaksinuar kundër COVID-19 kishin një rrezik 37.7% më të ulët për zhvillimin e ngjarjeve të rënda kardiovaskulare të lidhura me infeksionin COVID-19, gjatë një periudhe mesatare ndjekjeje prej rreth tetë muajsh.
Sipas studiuesve, vaksina u shoqërua me:
- 57.9% rrezik më të ulët për vdekje nga shkaqe kardiovaskulare;
- 38.5% rrezik më të ulët për infarkt në zemër;
- 41.9% rrezik më të ulët për shtrim në spital për shkak të insuficiencës së zemrës.
Ndërkohë, ulja e rrezikut për goditje në tru nuk rezultoi statistikisht domethënëse.
Përfitimet më të mëdha u vunë re te personat mbi 75 vjeç dhe ata me sëmundje kronike. Në këtë grupmoshë, efektiviteti i vaksinës në parandalimin e komplikimeve serioze kardiovaskulare të lidhura me COVID-19 arriti në 50.7%.
Megjithatë, autorët theksojnë se studimi është vëzhgues (observacional), që do të thotë se nuk provon se vaksina është shkaku i drejtpërdrejtë i uljes së rrezikut, por vetëm tregon një lidhje mes vaksinimit dhe rezultateve më të mira shëndetësore.
Kardiologu Glenn Hirsch, i cili nuk ishte pjesë e studimit, tha se gjetjet janë në përputhje me studime të mëparshme që kanë treguar se vaksinat kundër sëmundjeve infektive mund të ndihmojnë në uljen e rrezikut për infarkt, vdekje kardiovaskulare dhe shtrime në spital.
Sipas tij, infeksionet si COVID-19 shkaktojnë inflamacion të fortë në organizëm, i cili mund të rrisë rrezikun për mpiksje gjaku dhe dëmtime të arterieve. Vaksinimi, duke parandaluar ose zbutur infeksionin, mund të ulë këtë inflamacion dhe, si rrjedhojë, edhe rrezikun për komplikime të zemrës.
Eksperti shtoi se përfitimi i vaksinës në këtë studim ishte disi më i vogël krahasuar me studimet e mëhershme, çka mund të shpjegohet me faktin se variantet e fundit të COVID-19 shkaktojnë forma më të lehta të sëmundjes dhe se një pjesë e popullsisë ka krijuar imunitet nga infeksionet e mëparshme.
Autorët përfundojnë se vaksina kundër COVID-19 vazhdon të tregojë përfitime edhe në mbrojtjen e shëndetit kardiovaskular dhe rekomandojnë që qytetarët të konsultohen çdo vit me mjekun për vaksinimet e rekomanduara.
